Hytteprosjekt ramma av ny konkurs i Hallingdal

Eit hytteprosjekt i Nesbyen blir ramma av sin andre konkurs på kort tid. Etter at utbyggingsselskapet Buhovd Utvikling AS gjekk konkurs i fjor, er no også det tilknytta vatn- og avløpsselskapet Buhovd Va – Drift AS teke under konkursbehandling, melder Hallingdølen.

Ringerike og Hallingdal tingrett har opna konkursbehandling etter at styret sjølv melde oppbod. Konkursen kjem som ein direkte følgje av utbyggingsselskapet sin konkurs.

– Denne konkursen er ein direkte konsekvens av konkursen i utbyggingsselskapet, seier bustyrar og advokat Stian Hatleberg til avisa.

Hytteprosjektet i Søre Buhovd var opphavleg planlagt med 35 hyttetomter i Hallingnatten hyttegrend, men salet kom aldri skikkeleg i gang. Då utbyggingsselskapet gjekk konkurs, var det berre selt to tomter.

Va-selskapet hadde ei samla gjeld på 14,3 millionar kroner, medan selskapet berre sit med 448.000 kroner i likvide midlar, ifølgje Hallingdølen. Den største kreditoren er Sparebank 1 Hallingdal Valdres med eit krav på 11,8 millionar kroner.

– Me sit vel halvvegs med dette i fanget, seier administrerande direktør Knut Oscar Fleten i banken til avisa.

Prosjektet vart hardt ramma av fallet i hyttemarknaden, men banksjefen håper framleis på ei løysing som kan få selt tomtene.

– Tomtene blir salbare på eit tidspunkt. Eg er ikkje bekymra, seier Fleten.